Молитвы в скорби, отчаянии, тяжелой депрессии и унынии

Наде́ждо всех конце́в земли́, Пречи́стая Де́во, Госпоже́ Богоро́дице, утеше́ние на́ше! Не возгнуша́йся нас гре́шных, на Твою́ бо ми́лость упова́ем: угаси́ пла́мень грехо́вный и покая́нием ороси́ изсо́хшая сердца́ на́ша, очи́сти ум наш от грехо́вных помышле́ний, приими́ мольбы́, от души́ и се́рдца со воздыха́нием Тебе́ приноси́мыя. Бу́ди нам Хода́таица к Сы́ну Твоему́ и Бо́гу и отврати́ гнев Его́ ма́терними Твои́ми моли́твами, душе́вныя и теле́сныя я́звы исцели́, Госпоже́ Влады́чице, утоли́ боле́зни душ и теле́с, утиши́ бу́рю злых нападе́ний вра́жиих, отыми́ бре́мя грехо́в на́ших, и не оста́ви нас до конца́ поги́бнути, и печа́лию сокруше́нная сердца́ на́ша уте́ши, да сла́вим Тя до после́дняго издыха́ния на́шего. Ами́нь.

Ничто́же мя, о Мой Иису́се, ничто́же мя разлучи́т от любве́ Твоея́! Ни скорбь, ни теснота́, ни гоне́ние, ни глад, ни нагота́, ни беда́, ни меч. Ничто́же мя отлучи́т от любве́ Твоея́, Го́споди! Еди́но бо стяжа́ние мое́ — Ты, Сладча́йший Спа́се мой, и кроме́ Тебе́ на небеси́ и на земли́ не хощу́ ничто́же. Ты бо еси́ упокое́ние тружда́ющихся, утеше́ние пла́чущих, ра́дость скорбя́щих, исцеле́ние неду́гующих и спасе́ние гре́шных. В ру́це Твои́, Го́споди, предаю́ дух мой и печа́ль мою́, Ты мя спаси́ и поми́луй, я́ко Благ и Человеколю́бец. Ами́нь.