Молитвы о защите от врагов, зависти, клеветы и злых сил

Го́споди, Бо́же Вели́кий, Царю́ безнача́льный, посли́ Арха́нгела Твоего́ Михаи́ла на по́мощь раба́м Твои́м (имена). Защити́, Арха́нгеле, нас от всех враго́в, ви́димых и неви́димых. О, Госпо́день Вели́кий Арха́нгеле Михаи́ле! Демо́нов сокруши́телю, запрети́ всем врага́м, борю́щимся со мно́ю, и сотвори́ их я́ко о́вцы, и смири́ их зло́бныя сердца́, и сокруши́ их, я́ко прах пред лице́м ве́тра. О, Госпо́день Вели́кий Арха́нгеле Михаи́ле! Шестокрыла́тый пе́рвый Кня́же и Воево́до Небе́сных Сил — Херуви́мов и Серафи́мов, бу́ди нам помо́щник во всех беда́х, ско́рбех, в печа́лех, в пусты́нях и на моря́х ти́хое приста́нище. Изба́ви нас от вся́кия пре́лести диа́вольския, егда́ услы́шиши нас, гре́шных, моля́щихся тебе́, призыва́ющих и́мя твое́ свято́е. Ускори́ на по́мощь нам и побори́ всех, противя́щихся нам, си́лою Честна́го и Животворя́щаго Креста́ Госпо́дня, моли́твами Пресвяты́я Богоро́дицы, моли́твами святы́х апо́столов, святи́теля Никола́я Чудотво́рца и всех святы́х. Ами́нь.

Живы́й в по́мощи Вы́шняго, в кро́ве Бо́га Небе́снаго водвори́тся. Рече́т Го́сподеви: Засту́пник мой еси́ и Прибе́жище мое́, Бог мой, и упова́ю на Него́. Я́ко Той изба́вит тя от се́ти ло́вчи, и от словесе́ мяте́жна, плещма́ Свои́ма осени́т тя, и под криле́ Его́ наде́ешися: ору́жием обы́дет тя и́стина Его́. Не убои́шися от стра́ха нощна́го, от стрелы́ летя́щия во дни, от ве́щи во тьме преходя́щия, от сря́ща, и бе́са полу́деннаго. Паде́т от страны́ твоея́ ты́сяща, и тьма одесну́ю тебе́, к тебе́ же не прибли́жится, оба́че очи́ма твои́ма ссмо́триши, и воздая́ние гре́шников у́зриши. Я́ко Ты, Го́споди, упова́ние мое́, Вы́шняго положи́л еси́ прибе́жище твое́. Не прии́дет к тебе́ зло, и ра́на не прибли́жится телеси́ твоему́, я́ко А́нгелом Свои́м запове́сть о тебе́, сохрани́ти тя во всех путе́х твои́х. На рука́х во́змут тя, да не когда́ преткне́ши о ка́мень но́гу твою́, на а́спида и васили́ска насту́пиши, и попере́ши льва и зми́я. Я́ко на Мя упова́, и изба́влю и́: покры́ю и́, я́ко позна́ и́мя Мое́. Воззове́т ко Мне, и услы́шу его́: с ним есмь в ско́рби, изму́ его́ и просла́влю его́, долгото́ю дней испо́лню его́, и явлю́ ему́ спасе́ние Мое́.