Молитвы от пьянства, запоя и наркомании

О, Премилосе́рдная Влады́чице! К Твоему́ заступле́нию ны́не прибега́ем, моле́ний на́ших не пре́зри, но ми́лостивно услы́ши нас: жен, дете́й, матере́й; и тя́жким неду́гом пия́нства одержи́мых, и того́ ра́ди от ма́тере своея́ — Це́ркве Христо́вой и спасе́ния отпа́дающих, бра́тьев, и сесте́р, и сро́дник на́ших исцели́. О, Ми́лостивая Ма́ти Бо́жия, косни́ся серде́ц их и ско́ро возста́ви от паде́ний грехо́вных, ко спаси́тельному воздержа́нию приведи́ их. Умоли́ Сы́на Своего́, Христа́ Бо́га на́шего, да прости́т нам согреше́ния на́ша и не отврати́т ми́лости Своея́ от люде́й Свои́х, но да укрепи́т нас в трезве́нии и целому́дрии. Приими́, Пресвята́я Богоро́дице, моли́твы матере́й, о ча́дех свои́х сле́зы пролива́ющих; жен, о му́жех свои́х рыда́ющих; чад, си́рых и убо́гих, заблу́ждшими оста́вленных, и всех нас, к ико́не Твое́й припа́дающих. И да прии́дет сей вопль наш, моли́твами Твои́ми, ко Престо́лу Всевы́шняго. Покры́й и соблюди́ нас от лука́ваго ловле́ния и всех ко́зней вра́жиих, в стра́шный же час исхо́да на́шего помози́ пройти́ непреткнове́нно возду́шныя мыта́рства, моли́твами Твои́ми изба́ви нас ве́чнаго осужде́ния, да покры́ет нас ми́лость Бо́жия в несконча́емые ве́ки веко́в. Ами́нь.

О, многострада́льный и всехва́льный му́чениче Вонифа́тие! Ко твоему́ заступле́нию ны́не прибега́ем, моле́ний на́ших не отве́ржи, но ми́лостивно услы́ши нас. Исцели́ бра́тию на́шу (имена), тя́жким неду́гом пия́нства одержи́мых, и того́ ра́ди погиба́ющих. О, святы́й Вонифа́тие, ты сам пре́жде стра́стию винопи́тия побежда́емь был еси́, но благода́тию Христо́вою страсть сию́ попра́л еси́ и му́ченическим венце́м увенча́лся еси́. Помози́ у́бо и немощству́ющим рабо́м си́м, отжени́ от них па́губную страсть, да тре́звенно пожи́вше в ве́це сем, ве́чных благ сподо́бятся. Ами́нь.