Молитвы об исцелении болящих и при тяжелых болезнях

О, вели́кий уго́дниче Христо́в, страстоте́рпче и врачу́ многоми́лостивый Пантелеи́моне! Умилосе́рдися надо мно́ю, гре́шным рабо́м Бо́жиим (имя), услы́ши стена́ние и вопль мой, уми́лостиви Небе́снаго, Верхо́внаго Врача́ душ и теле́с на́ших, Христа́ Бо́га на́шего, да да́рует ми исцеле́ние от жесто́каго гнету́щаго мя неду́га. Приими́ недосто́йное моле́ние гре́шнейшаго па́че всех челове́к. Посети́ мя благода́тным посеще́нием. Не возгнуша́йся грехо́вных язв мои́х, пома́жи их еле́ем ми́лости твоея́ и исцели́ мя; да здрав сый душе́ю и те́лом, оста́ток дней мои́х, при по́мощи благода́ти Бо́жией, возмогу́ провести́ в покая́нии и угожде́нии Бо́гу, и сподо́блюся восприя́ти благи́й коне́ц живота́ моего́. Ей, уго́дниче Бо́жий! Умоли́ Христа́ Бо́га, да да́рует ми предста́тельством твои́м здра́вие те́лу и спасе́ние души́ мое́й. Ами́нь.

О, Всеблага́я, досточу́дная Ма́ти Бо́жия, Пантана́сса, Всецари́це! Несмь досто́ин, да вни́деши под кров мой! Но я́ко ми́лостиваго Бо́га любоблагоутро́бная Ма́ти, рцы сло́во, да исцели́тся душа́ моя́ и укрепи́тся немощству́ющее те́ло мое́. И́маши бо держа́ву непобеди́мую, и не изнемо́жет у Тебе́ всяк глаго́л, о Всецари́це! Ты за мя умоли́, Ты за мя упроси́. Да прославля́ю пресла́вное и́мя Твое́ всегда́, ны́не и в безконе́чныя ве́ки. Ами́нь.

О, всеблаже́нный испове́дниче, святи́телю о́тче наш Луко́, вели́кий уго́дниче Христо́в! Припа́дающе к тебе́, я́ко ча́да ко отцу́, мо́лим тя: услы́ши нас, гре́шных, и принеси́ моли́тву на́шу к Ми́лостивому и Человеколюби́вому Бо́гу, Ему́же ты ны́не в ра́дости святы́х и с ли́ки а́нгел предстои́ши. Вéруем бо, я́ко ты лю́биши ны то́ю же любо́вию, е́юже вся бли́жния возлюби́л еси́, на земли́ пребыва́я. Испроси́ у Христа́ Бо́га на́шего да утверди́т чад Свои́х в ду́се пра́выя ве́ры и благоче́стия: па́стырем да даст святу́ю ре́вность и попече́ние о спасе́нии вве́ренных им люде́й; боля́щим — здра́вие и исцеле́ние, скорбя́щим — утеше́ние, бедству́ющим — по́мощь. Всем же нам пода́й вся, я́же ко вре́менней жи́зни поле́зная, и ко ве́чному спасе́нию потре́бная. Ами́нь.