Молитвы о даровании детей и благополучных родах

К кому́ возопию́, Влады́чице, к кому́ прибе́гну в печа́ли мое́й; кому́ принесу́ сле́зы и воздыха́ния моя́, а́ще не к Тебе́, Цари́це Небесе́ и земли́! Кто исто́ргнет мя от ти́ны грехо́в и страсте́й, а́ще не Ты, Ма́ти Живота́, Засту́пнице и Прибе́жище ро́да челове́ческаго! Услы́ши стена́ние мое́, уте́ши мя и поми́луй в ско́рби мое́й, защити́ в беда́х и напа́стех, изба́ви от озлобле́ний и скорбе́й, и вся́ких неду́гов, и от враг ви́димых и неви́димых. Умири́ вражду́ оби́дящих мя, да явле́на бу́дет на мне сла́ва Твоя́. О, Влады́чице Ма́ти Бо́жия, пода́ждь ми чадородие благослове́нное, облегчи́ боле́зни рожде́ния и сохрани́ младе́нца во утро́бе мое́й здра́ва и невреди́ма, да во здра́вии принесе́н бу́дет ко свято́му креще́нию во сла́ву Бо́жию. Ами́нь.

О, присносла́внии Христо́вы пра́ведницы, святи́и богоотцы́ Иоаки́ме и А́нно, предстоя́щии Небе́сному Престо́лу Вели́каго Царя́ и ве́лие дерзнове́ние к Нему́ иму́щии, я́ко от Преблагослове́нныя Дще́ри ва́шея, Пречи́стыя Богоро́дицы и Присноде́вы Мари́и, воплоти́тися изво́лившему! К вам, я́ко многомо́щным предста́телем и усе́рдным о нас моли́твенникам, прибега́ем мы, гре́шнии и недосто́йнии. Умоли́те бла́гость Его́, я́ко да отврати́т от нас гнев Свой, по дело́м на́шим пра́ведно на ны дви́жимый, и да пода́ст нам разрешение неплодства на́шего, чадородие благословенное и мир до́му на́шему. Ами́нь.